எழுவோம் எழுவோம்.. தமிழராய் எழுவோம் ! விழ விழ எழுவோம்.. வீறுகொண்டு எழுவோம் !

வெள்ளி, 22 ஜூன், 2012

ஓட்டப்பிடாரத்தில் ஆய்வுக் கூட்டம்






ஓட்டப்பிடாரம், ஜூன் 21: ஓட்டப்பிடாரத்தில், கிராம நிர்வாக அலுவலர்களின் நடவடிக்கைகள் குறித்த ஆய்வுக் கூட்டம் வியாழக்கிழமை நடைபெற்றது.  ஓட்டப்பிடாரம் தொகுதி எம்எல்ஏ கிருஷ்ணசாமி, பொதுமக்களிடம் குறைதீர்க் கூட்டம் நடத்தி மனுக்கள் பெற்றுள்ளார். அந்த மனுக்களை சம்பந்தப்பட்ட ஓட்டப்பிடாரம், ஸ்ரீவைகுண்டம், தூத்துக்குடி வட்ட அலுவலகங்களில் ஒப்படைக்கப்பட்டதாம்.  பின்னர் அந்த மனுக்கள், அந்தந்த பகுதி கிராம நிர்வாக அலுவலர்களிடம் பரிசீலனைக்காக அளிக்கப்பட்டதாம். இருப்பினும் அவர்கள் இதுவரை நடவடிக்கை எடுக்கவில்லையென கூறப்படுகிறது.  இத்தகைய போக்கை கண்டித்து ஜூலை 9-ம் தேதி மாவட்ட ஆட்சியர் அலுவலகத்தை முற்றுகையிடும் போராட்டம் நடத்தவுள்ளதாக கிருஷண்சாமி எம்எல்ஏ அறிவித்தார்.  இதற்கிடையே, அந்த மனுக்கள் மீது எடுக்கப்பட்டுள்ள நடவடிக்கை குறித்து கேட்டறிய கிராம நிர்வாக அலுவலர்களுக்கான ஆய்வுக் கூட்டம் வியாழக்கிழமை நடைபெற்றது.  ஓட்டப்பிடாரம் வட்டாட்சியர் அலுவலகத்தில் நடைபெற்ற இக் கூட்டத்துக்கு, மாவட்ட வருவாய் அலுவலர் எஸ்.அமிர்தஜோதி தலைமை வகித்தார்.  வட்டாட்சியர் ராமசுப்பிரமணியன், சமூக பாதுகாப்புத் திட்ட வட்டாட்சியர் காளிமுத்து உள்பட கிராம நிர்வாக அலுவலர்கள், வருவாய் அலுவலர்கள் கலந்து கொண்டனர்.  அனைத்து கிராம நிர்வாக அலுவலர்களும் தகுதி வாய்ந்தவர்களுக்கு முதியோர் உதவித்தொகை அளிக்கத் தேவையான நடவடிக்கைகளை ஜூலை 31-ம் தேதிக்குள் எடுத்து புள்ளி விவரத்துடன் வழங்க வேண்டுமென கூட்டத்தின்போது உத்தரவிடப்பட்டது.

ஜூலை 9-ல் முற்றுகை போராட்டம்: கிருஷ்ணசாமி

  தூத்துக்குடி, ஜூன் 20: மனுக்கள் மீது நடவடிக்கை எடுக்க வலியுறுத்தி ஜூலை 9-ம் தேதி முற்றுகைப் போராட்டம் நடத்தப் போவதாக புதிய தமிழகம் கட்சித் தலைவரும், ஒட்டப்பிடாரம் தொகுதி சட்டப்பேரவை உறுப்பினருமான டாக்டர் கே.கிருஷ்ணசாமி கூறினார்.  தூத்துக்குடியில் புதன்கிழமை அவர் அளித்த பேட்டி:  தூத்துக்குடி மாவட்டம், மாப்பிள்ளையூரணியில் பெரும்பான்மையான மக்கள் 40 ஆண்டுகளுக்கும் மேலாக வீட்டுமனை பட்டா கேட்டு அலைந்து கொண்டிருக்கிறார்கள். ஆனால் நிலப்பட்டா மாற்றத்தை, வீட்டுமனை பட்டா வழங்குவதுபோல் கணக்கு காட்டப்படுகிறது. இதுபோல் முதியோர், கணவனால் கைவிடப்பட்டோர், விதவைகள், மாற்றுத் திறனாளிகள் அரசின் உதவித்தொகை கேட்டு மனு அளித்து வருகின்றனர். ஆனால், அவர்களது மனு மீது எந்தவித நடவடிக்கையும் எடுக்கப்படவில்லை.  ஒட்டப்பிடாரம் தொகுதியில் கடந்த மே 20, 21 தேதிகளில் நடைபெற்ற மனுநீதி நாள் கூட்டத்தில் பொதுமக்கள் கொடுத்த மனுக்களை, மாவட்ட நிர்வாகத்திடம் வழங்கினேன். இதுவரை அந்த மனுக்களுக்கு எந்தவித நடவடிக்கையும் இல்லை. மாவட்ட நிர்வாகம் செயலிழந்து விட்டது. தூத்துக்குடி மாவட்டத்தில் 10, 15 நாள்களுக்கு ஒருமுறை தான் குடிநீர் கிடைக்கிறது. எனவே இதைக் கண்டித்து ஜூலை 9-ம் தேதி எனது தலைமையில் முற்றுகைப் போராட்டம் நடைபெற உள்ளது என்றார்.

வெள்ளி, 11 மே, 2012

ஜாதிவாரி கணக்கெடுப்பு: கிருஷ்ணசாமி வேண்டுகோள்

சென்னை: புதிய தமிழகம் கட்சி நிறுவன தலைவர் கிருஷ்ணசாமி நிருபர்களிடம் கூறியதாவது:  தமிழகத்தில் கடந்த 1ம் தேதி முதல் ஜாதிவாரி மக்கள் தொகை கணக்கெடுப்பு தொடங்கி ஆமை வேகத்தில் நடந்து வருகிறது. இந்த கணக்கெடுப்பு பணியில் சத்துணவு பணியாளர்கள், அங்கன்வாடி அமைப்பாளர்கள் மட்டுமே ஈடுபடுத்தப்பட்டுள்ளனர். இவர்கள், ஜாதி பின்னணி என்னவென்று தெரியாமல் உள்ளனர். இது போன்றவர்கள் கணக்கெடுப்பதால், உண்மை பிரதிபலிக்கப்படாது, கணக்கெடுப்பு முடிந்த பின்பு, பிரச்னைகளும், சர்ச்சைகளுமே எழும். திறன்பெற்றவர்கள் மற்றும் சமூகத்தை புரிந்து கொண்டவர்களை மட்டும் ஜாதிவாரி கணக்கெடுப்பில் ஈடுபடுத்த வேண்டும்.  பட்டியல் இனத்தில் பள்ளர், பறையர், சக்கலியர் உள்ளனர். பள்ளர் தேவேந்திர குலவேளாளர் என்றும், பறையர் ஆதிதிராவிடர் என்றும், சக்கலியர் அருந்ததியர் என்றும் அடையாளப்படுத்த வேண்டும்.

சனி, 5 மே, 2012

வரும் 30-ல் கிருஷ்ணசாமி உண்ணாவிரதம்

தூத்துக்குடி : நலத்திட்ட உதவிகளை வழங்குவதி்ல மாவட்ட ‌கலெக்டர் முட்டுக்கட்டை போடுகிறார் என ஒட்டப்பிடாரம் தொகுதி எம்.எல்.ஏ., புதிய தமிழகம் தலைவர் கிருஷ்ணசாமி தெரிவித்துள்ளார். மேலும் அவர் கூறியதாவது:மாவட்ட கலெக்டர் ஆஷிஸ் குமார் மணல் கொள்ளைக்கு ஆதரவாக செயல்படுகிறார். ‌‌தொகுதி மக்களுக்கு நலத்திட்ட உதவி பெற வழங்கும் பரிந்துரை கடிதத்தின் மீது நடவடிக்கை எடுப்பதில்லை. கலெக்டரின் இத்தகைய போக்கை கண்டித்து வரும் 30-ம் தேதி உண்ணாவிரதம் இருக்க போவதாகவும், முதல்வரிடம் இது சம்பந்தமாக புகார் அளிப்பதாகவும் தெரிவித்தார். மேலும் சட்ட சபையில் சிறப்பு கவன ஈர்ப்பு தீர்மானம் மூலம் இப்பிரச்னை எழுப்ப இருப்பதாகவும் தெரிவித்துள்ளார்.

தீண்டாமை ஒழிப்புச் சட்டம் குறித்து காரசார விவாதம்

சென்னை: தீண்டாமை ஒழிப்புச் சட்டம் குறித்து, சட்டசபையில் நேற்று காரசாரமாக விவாதம் நடந்தது. இதில், உள்ளாட்சித்துறை அமைச்சர் முனுசாமி பேசும்போது,தீண்டாமை ஒழியும்போது, தீண்டாமை ஒழிப்புச் சட்டம் தானாக போய்விடும், என்றார்.
ஆதிராவிடர் மற்றும் பழங்குடியினர் நலத்துறை மானியக் கோரிக்கை மீது நடந்த விவாதம்:
கிருஷ்ணசாமி-புதிய தமிழகம்: ஆதிராவிட, பழங்குடியின மக்கள் முன்னேற்றத்திற்காக, சிறப்பு உட்கூறு திட்டத்தை, இந்திரா பிரதமராக இருந்தபோது அறிமுகப்படுத்தினார். அத்திட்டங்கள், காங்கிரஸ் ஆளும் மாநிலங்களிலேயே செயல்படுத்தப்படுவதில்லை. ஆனால், தமிழகத்தில், இத்திட்டம் சிறப்பாக அமல்படுத்தப்படுகிறது. இத்துறைக்கு ஒதுக்கப்படும் நிதி, சிந்தாமல், சிதறாமல் மக்களைச் சென்றடைய அரசு நடவடிக்கை எடுக்க வேண்டும். (இதையடுத்து, கிருஷ்ணசாமி தெரிவித்த கருத்துக்கள் சலசலப்பை ஏற்படுத்தின.)
உள்ளாட்சித் துறை அமைச்சர் முனுசாமி: ஜாதியை முன்னிறுத்தி உறுப்பினர் பேசுகிறார். ஜாதியை முன்னிறுத்தி, ஆதிராவிட, பழங்குடியின மக்களின் வேகத்தை குறைக்க வேண்டாம். அவர்களின் திறமையை குறைக்க வேண்டாம்.
பாலபாரதி-மார்க்சிஸ்ட்: ஜாதியை முன்னிறுத்துவதாக அமைச்சர் கூறுகிறார். ஆனால், ஜாதிவாரி மக்கள் தொகை கணக்கெடுப்பை அரசே நடத்துகிறது. ஜாதி அமைப்பு என்பது, நெடுங்காலமாகவே இருந்து வருகிறது.தீண்டாமை ஒழிப்புச் சட்டம் இருந்தாலும், பல இடங்களில் தீண்டாமை கொடுமை சம்பவங்கள் நடக்கின்றன. திறமைக்கும், ஜாதிக்கும் சம்பந்தமில்லை.
அமைச்சர் முனுசாமி: திறமை இருந்தால், ஜாதியைப் பற்றி இழுக்க வேண்டியதில்லை என்று தான் கூறினேன். தீண்டாமை இருப்பதாக உறுப்பினர் கூறுகிறார். எந்த மாவட்டம், எந்த கிராமத்தில் என்று குறிப்பிட்டு கூற வேண்டும்.
பாலபாரதி: இது தொடர்பாக நான் வெட்டுத் தீர்மானமே கொடுத்துள்ளேன். அதில், விவரமாக உள்ளது.
அமைச்சர் முனுசாமி: வெட்டுத் தீர்மானம் இறுதியானது கிடையாது. அதைப்பற்றி அரசு முழுமையாக விசாரித்து, உண்மையை அறிந்தால் மட்டுமே ஒரு முடிவுக்கு வர முடியும். வெட்டுத் தீர்மானம் கொடுத்து விட்டாலே, அது தான் உண்மை என்று ஆகிவிடாது.
சவுந்தரராஜன்-மார்க்சிஸ்ட்: தீண்டாமை ஒழிக்கப்படாதபோது, தீண்டாமை ஒழிப்புச் சட்டம் மட்டும் எதற்கு?
அமைச்சர் முனுசாமி: தீண்டாமை ஒழியும் வரை, அது மறையும் வரை சட்டம் இருக்கும். ஒரு கட்டத்தில் தீண்டாமை ஒழியும்போது, சட்டம் தானாக போய்விடும்.
கிருஷ்ணசாமி-புதிய தமிழகம்: எஸ்.சி., என்றால், பட்டியல் இனம் என்று தான் பொருள். இந்த பட்டியல் இனத்தில், 76 ஜாதிகள் உள்ளன. அதில் ஒரு ஜாதிதான் ஆதிராவிடர். ஆனால், ஒட்டுமொத்த இனங்களுக்கும் சேர்த்து பொதுவாக ஆதிதிராவிடர் என அழைப்பது சரியல்ல. வட மாநிலங்களில், ஆதிராவிடர் என்றால் என்னவென்றே தெரியவில்லை.
செ.கு.தமிழரசன்-இந்திய குடியரசுக் கட்சி: 1921ல் இதே சபையில், அனைத்து ஜாதிகளுக்கும் சேர்த்து தான் ஆதிதிராவிடர் என குறிப்பிட்டு தீர்மானம் நிறைவேற்றப்பட்டுள்ளது.
நிதி அமைச்சர் பன்னீர்செல்வம்: விவாதம் எங்கேயோ போகிறது. இத்துடன், இப்பிரச்னையை நிறுத்திவிடுவது நல்லது. இவ்வாறு விவாதம் நடந்தது.
பாக்கு கேள்வியால் சிரிப்பலை: சட்டசபையில் நேற்று கேள்வி நேரத்தின்போது, ஆத்தூர் தொகுதியில் பாக்கு கொள்முதல் நிலையம் அமைக்கப்படுமா? என, அ.தி.மு.க., உறுப்பினர் மாதேஸ்வரன் கேள்வி எழுப்பினார். அதற்கு,பாக்கு கொள்முதல் நிலையம் அமைப்பதற்கான சாத்தியம் இல்லை என, வேளாண் துறை அமைச்சர் தாமோதரன் பதிலளித்தார். அதைதொடர்ந்து, அ.தி.மு.க., உறுப்பினர் சின்னசாமி, பாக்கு மருத்துவ குணம் கொண்டதா? என கேட்டவுடன், அவையில் உறுப்பினர்கள் அனைவரும் சிரித்தனர். அதற்கு பதிலளித்து பேசிய அமைச்சர் தாமோதரன்,குடற்புழு நீக்கம், தோல் வறட்சி போக்குதல், ரத்த சிவப்பு அணுக்கள் அதிகரித்தல் போன்ற மருத்துவ குணம் உடையது. அதேபோல், தொழிற்சாலைகளில் தோல் பதனிடுதல் போன்ற பல பணிகளுக்கு பயன்படுத்தப்படுகிறது. இதை அதிகம் பயன்படுத்தினால் சிறு மூளை பாதிக்கும். போதை வாஸ்து கொண்ட பாக்கு பொருட்களை பயன்படுத்துவதை தவிர்க்க வேண்டும் என்றார். பாக்கு கொள்முதல் நிலையம் அமைக்கப்படுமா என்ற கேள்வியால், அவையில், நீண்ட நேரம் உறுப்பினர்களின் சிரிப்பலை தொடர்ந்தது.

வெள்ளி, 20 ஏப்ரல், 2012

மருத்துவமனைகளுக்கு தரம் காப்பீட்டு வசதிக்காக ஏற்பாடு

சென்னை : அரசு காப்பீட்டுத் திட்டத்தில், மதிப்பெண்கள் அடிப்படையிலேயே, மருத்துவமனைகள் சேர்க்கப்படுகின்றன என, அமைச்சர் விஜய் கூறினார். சட்டசபையில் கேள்வி நேரத்தின்போது, "புதிய காப்பீட்டுத் திட்டத்தில், எந்த அடிப்படையில் மருத்துவமனைகள் சேர்க்கப்படுகின்றன,' என, புதிய தமிழகம் கட்சித் தலைவர் கிருஷ்ணசாமி, கேள்வி எழுப்பினார்.

தரம் பிரிப்பு எப்படி? : அதற்கு பதில் அளித்த சுகாதாரத்துறை அமைச்சர் விஜய் கூறியதாவது: புதிய காப்பீட்டுத் திட்டத்தில் மருத்துவமனைகளைச் சேர்க்க, சில நிபந்தனைகளை அரசு நிர்ணயித்து உள்ளது. மருத்துவமனைகளின் தரத்திற்கு ஏற்ப, மதிப்பெண்கள் வழங்கப்படும். முப்பது படுக்கைகள், ஐந்து தீவிர சிகிச்சைப் பிரிவு இருந்தால், அவற்றிற்கு 15 மதிப்பெண்கள் வழங்கப்படும். "சிடி' மற்றும் எம்.ஆர்.ஐ., ஸ்கேன் இருந்தால், அதற்கு தனி மதிப்பெண் வழங்கப்படும். தரத்திற்கு ஏற்ப அதிகபட்சம், 51 மதிப்பெண்கள் வரை வழங்கப்படுகிறது.மொத்தம், 41 மதிப்பெண்களுக்கு மேல் எடுத்தால், "ஏ1' என, மருத்துவமனை தரம் பிரிக்கப்படுகிறது. மதிப்பெண்களை குறைய குறைய, அதற்கேற்ப, தரம் குறையும் .குறைந்த பட்சம் 10 மதிப்பெண்கள் வரை இப்பட்டியலில் இடம் பெறும் மருத்துவமனைகள், "ஏ1" முதல் "ஏ6' வரை தரம் பிரிக்கப் படுகின்றன.

ஏமாற்ற முடியாது : இதன் அடிப்படையில், அதற்கென உள்ள கமிட்டியில், யுனைடெட் இந்தியா இன்சூரன்ஸ் மற்றும் சுகாதாரத்துறை அதிகாரிகள் இருந்து முடிவு செய்வர். அதன்படியே, காப்பீட்டுத் திட்டத்தில் மருத்துவமனைகள் சேர்க்கப் படுகின்றன. எனவே, தரமற்ற மருத்துவமனைகள் காப்பீட்டுத் திட்டத்தில் சேர்வதற்கு வாய்ப்பில்லை.
இவ்வாறு அவர் கூறினார்.

வியாழன், 12 ஏப்ரல், 2012

உதவி பேராசிரியர்கள் நியமனத்தில் முறைகேடுகள் நடக்கவில்லை: அமைச்சர்


சென்னை: ""பாரதியார் பல்கலைக்கழகத்தில் உதவிப் பேராசிரியர்கள் நியமனத்தில் முறைகேடுகள் நடக்கவில்லை,'' என்று, அமைச்சர் பழனியப்பன் கூறினார்.

சட்டசபையில் கிருஷ்ணசாமி (புதிய தமிழகம்) எழுப்பிய பிரச்னைக்கு பதிலளித்து, உயர் கல்வித் துறை அமைச்சர் பழனியப்பன் கூறியதாவது: பல்கலைக்கழக மானியக் குழுவின் 11வது ஐந்தாண்டுத் திட்டத்தின் கீழ், பாரதியார் பல்கலைக்கழகத்தில், 35 உதவிப் பேராசிரியர்களை நியமிக்க, 20 கோடி ரூபாய் மானியம் வழங்கப்பட்டது. ஐந்தாண்டுகளுக்குப் பின் ஏற்படக் கூடிய செலவை, மாநில அரசே ஏற்க வேண்டும் என்ற நிபந்தனையின் அடிப்படையில், இந்த நியமனத்திற்கு ஒப்புதல் அளிக்கப்பட்டது. அதன்படி, "தினமலர்' நாளிதழில் கடந்த ஆண்டு ஜனவரி 27ம் தேதி விளம்பரம் வெளியிடப்பட்டது. விண்ணப்பித்தவர்களின் பட்டியல் பரிசீலிக்கப்பட்டு, தகுதியானவர்கள் நேர்காணலுக்கு அழைக்கப்பட்டனர். பின், 24 பேர் மட்டுமே பணியில் சேர்ந்தனர். இந்த நியமனங்களை எதிர்த்து சென்னை ஐகோர்ட்டில் தொடரப்பட்ட வழக்கை, ஐகோர்ட் தள்ளுபடி செய்துவிட்டது. "பாரதியார் பல்கலைக் கழகம், நியமனத்தின் போது விதிகளை முழுமையாகக் கடைபிடித்துள்ளது. முறைகேடுகள் ஏதும் நடக்கவில்லை' என்று கோர்ட் தீர்ப்பளித்தது. இதை எதிர்த்து, ஆசிரியர் சங்கத்தினர் மேல்முறையீடு செய்துள்ளனர். தேர்வு செய்யப்பட்டவர்களில் ஒருவர் பணியில் சேரவில்லை. மீதமுள்ள 23 பேரும், கடந்த 1ம் தேதி முதல் பணியில் தொடர உத்தரவிடப்பட்டுள்ளது. ஆனால், அவர்களுக்கு பணி நிரந்தரம் செய்யப்படவில்லை. இவ்வாறு அமைச்சர் கூறினார்.