புதன், 12 அக்டோபர், 2011
ஊழலற்ற நிர்வாகத்தை ஏற்படுத்திய கட்சி புதிய தமிழகம்: கிருஷ்ணசாமி!
அ.தி.மு.க.,-திமுக.,வுக்கு ஆதரவு இல்லை: புதிய தமிழகம் தலைவர் டாக்டர் கிருஷ்ணசாமி
திருச்சி இடைத் தேர்தல்- திமுகவுக்கு புதிய தமிழகம் ஆதரவு

வரும் 13ம் தேதி நடக்கும் இந்த இடைத் தேர்தலில் திமுக வேட்பாளராக முன்னாள் அமைச்சர் கே.என்.நேரு போட்டியிடுகிறார். திமுக பொருளாளர் மு.க.ஸ்டாலின் திருச்சியில் தங்கியிருந்து தேர்தல் பணிகளை கவனித்து வருகிறார்.
இந் நிலையில் ஸ்டாலினை, புதிய தமிழகம் கட்சியின் திருச்சி புறநகர் மாவட்டச் செயலாளர் ஐயப்பன், மாநகர மாவட்டச் செயலாளர் சங்கர் ஆகியோர் நேரில் சந்தித்து, நடைபெறவுள்ள திருச்சி மேற்கு தொகுதி இடைத் தேர்தலில் திமுக வேட்பாளருக்கு புதிய தமிழகம் ஆதரவு அளிக்கும் என்று தெரிவித்தனர்.
பரமகுடி சம்பவம் தேர்தலில் எதிரொலிக்கும்-கிருஷ்ணசாமி:
இந் நிலையில் பரமக்குடி போலீஸ் துப்பாக்கிச் சூட்டில் 9 அப்பாவி தலித் மக்கள் கொல்லப்பட்ட விவகாரம், திருச்சி மேற்கு தொகுதி இடைத்தேர்தலில் எதிரொலிக்கும் என்று புதிய தமிழகம் கட்சியின் தலைவர் டாக்டர் கிருஷ்ணசாமி கூறியுள்ளார்.
நிருபர்களிடம் அவர் பேசுகையில், உள்ளாட்சித் தேர்தலில் எதிர்க்கட்சிகள் ஆயத்தமாக போதிய அவகாசம் கொடுக்கப்படவில்லை. வாக்காளர் பட்டியல் வெளியீடு, உள்ளாட்சி அமைப்புகளின் எல்லை வரையறை ஆகியவை அறிவிக்கப்படும் முன், ஆளுங்கட்சி சார்பில் வேட்பாளர்கள் அறிவிக்கப்பட்டனர்.
கடந்த சட்டசபை தேர்தலில் கூட்டாக இருந்த 9 கட்சிகளை கடைசி நிமிடம் வரை, கூட்டாளி என்று நினைக்க வைத்து அதிமுக தலைமை ஏமாற்றி விட்டது. உள்ளாட்சித் தேர்தலில் தனித்துப் போட்டியிட்டு அதிக இடங்களை பிடித்து விடலாம் என்ற அதிமுகவின் கனவு பலிக்காது. மாறாக மிகப்பெரிய தோல்வியே கிடைக்கும்.
கடந்த செப்டம்பர் 11ம் தேதி பரமக்குடியில் போலீசார் நடத்திய துப்பாக்கிச் சூட்டில், ஒன்பது தலித்கள் இறந்தனர். இதற்கு குறைந்தபட்ச மனிதாபிமான விஷயமான ஆறுதல் கூட, அதிமுக தரப்பில் தெரிவிக்கவில்லை.
இதை ஜாதிக் கலவரமாக சித்தரிக்கின்றனர். துப்பாக்கிச் சூட்டில் தலித்கள் கொல்லப்பட்ட விவகாரம் திருச்சி மேற்கு தொகுதியில் நிச்சயம் எதிரொலிக்கும். உள்ளாட்சித் தேர்தலை பொறுத்தவரை அதிமுகவுக்கு புதிய தமிழகம் நிச்சயம் ஆதரவு தரவில்லை. நேர்மையான சுயேச்சைகளுக்கு ஆதரவு தருவோம் என்றார்.
சனி, 8 அக்டோபர், 2011
வெள்ளி, 7 அக்டோபர், 2011
அதிமுகவுக்கு வாக்களிக்க வேண்டாம்: கிருஷ்ணசாமி
| |

புதிய தமிழகம் கட்சியின் நிறுவனர் டாக்டர் கிருஷ்ணசாமி வெளியிட்டுள்ள அறிக்கையில்,
திருச்சி மேற்கு தொகுதி இடைத்தேர்தலில் அதிமுகவுக்கு ஆதரவு அளிப்பதில்லை என புதிய தமிழகம் முடிவு செய்கிறது. எனவே, புதிய தமிழகம் தொண்டர்களும், ஆதரவாளர்களும் அதிமுகவுக்கு வாக்களிக்க வேண்டாம் என உயர்மட்டக்குழு கேட்டுக்கொள்கிறது.
இவ்வாறு டாக்டர் கிருஷ்ணசாமி கூறியுள்ளார்
ஜெ.விடம் மாற்றம் ஏற்பட்டிருக்கும் என முதல்வராக்கிய மக்கள் ஏமாற்றம் அடைந்தனர்: டாக்டர் கிருஷ்ணசாமி
ஜெ.விடம் மாற்றம் ஏற்பட்டிருக்கும் என முதல்வராக்கிய மக்கள் ஏமாற்றம் அடைந்தனர்: டாக்டர் கிருஷ்ணசாமி

சென்னையில் செய்தியாளர்களிடம் பேசிய
| |
பரமக்குடி துப்பாக்கிச்சூட்டில் 7 பேர் கொல்லப்பட்டனர். காவல்துறை அத்துமீறி நடந்துகொண்ட இந்தச் செயலுக்கு தமிழக காவல்துறைக்கு தலைமை தாங்குகிற முதல்வர் ஜெயலலிதா அவர்களிடம் இருந்து கண்டன குரல் வராவிட்டாலும் கூட குறைந்த பட்ச அனுதாபத்தையாவது, தேவேந்திர குல மக்கள் எதிர்பார்த்தார்கள்.
ஆனால், முதல் அமைச்சர் அனுதாபம் தெரிவிப்பதற்கு பதிலாக, போலீசாரின் அத்துமீறலை மூடி மறைக்கும் வகையில் துப்பாக்கிச் சூட சம்பவத்திற்கு ஜாதி சாயம் பூச முற்பட்டார். நல்லதொரு சுமூக சூழல் தென் தமிழகத்தில் மலர்ந்து வரும நேரத்தில் முதல் அமைச்சரின் இந்தப் பேச்சு எந்த தரப்பு மக்களுக்கும் ஏற்புடையதாக இல்லை. இந்த பரமக்குடி கொடிய சம்பவத்திற்கு காரணமான காவல்துறை உயர் அதிகாரிகள் மீது, உடனடி நடவடிக்கை எடுக்கும் வகையில் இடைக்கால பணிநீக்கம் செய்ய வேண்டும். உயர் நீத்த குடும்பங்களுக்கு உரிய நஷ்டஈடு வழங்க வேண்டும் என்ற எந்த விதமான கோரிக்கையையும் ஜெயலலிதா அரசு ஏற்றுக்கொள்ளவில்லை.
ஜெயலலிதா அரசின் கடந்த கால ஆட்சியில் தாழ்த்தப்பட்ட மற்றும் பழங்குடியின மக்களுக்கு எதிராக 1995ல் கொடியங்குளம் சம்பவம், அதே ஆண்டு அக்டோபர் 6ல் மெரினா துப்பாக்கிச் சூடு, 1992ல் வாச்சாத்தி சம்பவம், அதே ஆண்டு செங்கல்பட்டு காரணையில் பஞ்சமி நில மீட்பு போராட்டத்தில் நிகழ்த்திய துப்பாக்கிச் சூடு, 1994ல் சிதம்பரம் பத்மினி மானபங்கம் செய்யப்பட்டு கொலை செய்யப்பட்ட வழக்கு போன்ற எண்ணற்ற சம்பவங்களால், ஜெயலலிதா அவர்கள் மீதும் அவரது அரசு மீதும் வெறுப்புற்ற இருந்த மக்கள் காலத்தால் அவரிடம் மாற்றங்கள் ஏற்பட்டிருக்கும் என நம்பி நடந்து முடிந்த சட்டமன்ற தேர்தலில் முழுமையாக ஆதரித்து வெற்றிப் பெற செய்தார்கள். இவ்வாறு முதல் அமைச்சராக்கிய மக்களுக்கு ஏமாற்றம் அளிக்கும் வகையில் ஆட்சிக்கு வந்த 4 மாதங்களுக்குள் காவல்துறையை கட்டவிழ்த்துவிட்டு, தாழ்த்தப்பட்ட மக்களின் 7 உயிர்கள் பலிவாங்கப்பட்டுள்ளது.
இந்த துயர சம்பவம் குறித்து, சிறிதும் கூட மனவருத்தம் கொள்ளாது, தவறு இழைத்த காவல்துறை அதிகாரிகள் மீது நடவடிக்கை எடுக்காதது, பாதிக்கப்பட்ட மக்களுக்கு உரிய இழப்பீடு வழங்காதது போன்ற காரணங்களால் ஒட்டுமொத்த தாழ்த்தப்பட்ட மக்களும் இந்த அரசு மீது வெறுப்பாக உள்ளனர்.
இப்படிப்பட்ட சூழலில் வரும் 13ஆம் தேதி நடைபெற இருக்கும் திருச்சி மேற்கு தொகுதி இடைத்தேர்தலில் அதிமுகவுக்கு எந்தவிதத்திலும் ஆதரவு அளிப்பதில்லை என தொண்டர்களின் கருத்துக்கிணங்க புதிய தமிழகம் முடிவு செய்கிறது.
இவ்வாறு டாக்டர் கிருஷ்ணசாமி கூறியுள்ளார்.
ஞாயிறு, 2 அக்டோபர், 2011
''ஜெ. வருந்தவும் இல்லை, திருந்தவும் இல்லை!' டாக்டர் கிருஷ்ணசாமி'
கடந்த சட்டமன்றத் தேர்தலில் அ.தி.மு.க. அணியில் முதல் கட்சியாக நுழைந்தது, புதிய தமிழகம். மூன்று தமிழர் உயிர்காப்பு, பரமக்குடி கலவரம் ஆகியவற்றை சட்டமன்றத்தில் கிளப்பியதன் மூலம் ஜெயலலிதாவின் கோபத்தை முதலில் பெற்றவரும் இவர்தான். இப்போது, கூட்டணி நிலவரம் களேபரம் ஆகியிருக்க... புதிய தமிழகம் கட்சித் தலைவர் டாக்டர் கிருஷ்ணசாமியிடம் பேசினோம். ''அ.தி.மு.க. தலைமை, கூட்டணிக் கட்சிகளை மிக மோசமாக அவமதித்துவிட்டது என்று எதிர் அணியினரே ஆதங்கப்படுகிறார்களே?'' ''தி.மு.க-வைப் போலவே ஆட்சியைப் பிடிப்பதற்காக, அ.தி.மு.க-வும் கடந்த சட்டமன்றத் தேர்தலில் ஒரு மெகா கூட்டணியை அமைத்தது. மரபுப்படி, அதே அணிதான் உள்ளாட்சித் தேர்தல், அடுத்து வரும் நாடாளுமன்றத் தேர்தல் வரையிலும் தொடர வேண்டும். ஆனால், ஆட்சிக்கு வந்து நான்கு மாதங்கள்கூட முடியாத நிலையில், கூட்டணிக் கட்சிகளை ஒட்டுமொத்தமாக ஒதுக்கி, உதாசீனப்படுத்தி உள்ளது, அ.தி.மு.க. தலைமை. வழக்கமாக, கூட்டணியின் அங்கமாக இருக்கும் கட்சிகள்தான், ஆளும் கட்சியின் குறைகள், கருத்து வேறுபாடுகளால் அணியில் இருந்து விலகும். இதுவரை தமிழக அரசியலில் கூட்டணித் தலைமையே மற்ற கட்சிகளை ஒதுக்கித் தள்ளியது இல்லை. ஜெயலலிதா இப்போது அதையும் செய்துகாட்டி இருக்கிறார். இது, கூட்டணி தர்மத்தை அப்பட்டமாக மீறுவதாகும்!'' ''ஜெயலலிதா இப்படி நடந்துகொள்ள என்ன காரணம்?'' ''கடந்த தி.மு.க. ஆட்சியின் மொத்தத் தவறுகளுக்காகவும் அந்தக் கட்சி சட்டமன்றத் தேர்தலில் மிக மோசமாகத் தோற்கடிக்கப்பட்டது. இன்று காங்கிரஸ் துணைகூட இல்லாமல், தன்னைத்தானே தனிமைப்படுத்திக்கொண்டு நிற்கிறது. அதை முற்றாக வீழ்த்துவதற்கு இதுவே சரியான தருணம். சட்டமன்றக் கூட்டணியே இப்போதும் தொடரும் பட்சத்தில் உள்ளாட்சித் தேர்தலில் எந்த இடத்திலும் தி.மு.க. டெபாசிட் வாங்கக்கூட முடியாது. ஆனால், ஜெயலலிதா தன் இமாலயத் தவறுகளால் தி.மு.க-வுக்கு மறுபடியும் வாழ்வு கொடுக்கிறார். மறைமுகமாக உதவி செய்கிறாரோ என்றுகூட சந்தேகமாக இருக்கிறது. எங்கோ ஓர் இடத்தில் எதற்காகவோ சமரசம் நடக்கிறது. எதற்காகவோ ஜெயலலிதா பின்வாங்குகிறார், அச்சப்படுகிறார் என்றுகூட நினைக்கிறேன். ஜெயலலிதாவின் முதல் (1991)ஆட்சிக் காலத்தில் அவரை வேறு யாரோ இயக்குகிறார்கள் என்ற குற்றச்சாட்டு இருந்தது. 2001-ல் ஆட்சிக்கு வந்தபோது அவரிடம் சிறிது மாற்றம் ஏற்பட்டது போல இருந்தது. ஆனால், இந்த ஆட்சியைப் பார்க்கும்போது, ஜெ. சுயமாக செயல்படவில்லை; பின்னால் இருந்துகொண்டு அவரை யாரோ இயக்குகிறார்கள் என்றுதான் தோன்றுகிறது.'' ''பரமக்குடி சம்பவத்தில் முதல்வரின் தவறு என்ன என்று நினைக்கிறீர்கள்..?'' ''பொதுவாக, ஜெயலலிதா ஆட்சியில் எல்லாக் காலகட்டங்களிலும் ஒடுக்கப்பட்டோர் மீது அத்துமீறல்கள் நடந்துள்ளன. வாச்சாத்தியில் வெறியாட்டம், சிதம்பரம் பத்மினி, சின்னாம்பதியில் பழங்குடியினர், கொடியங்குளம் வன்முறை எனப் பல சம்பவங்களைச் சொல்ல முடியும். காலம் அவரிடம் மாற்றத்தை உருவாக்கும் என நம்பினோம். ஆனால், ஜெயலலிதாவிடம் எந்த மாற்றமும் உருவாகவில்லை. சட்டமன்றத் தேர்தலில் தி.மு.க. ஆட்சி போக வேண்டும்; நல்ல ஆட்சி வர வேண்டும் என்றுதான் மக்கள் வாக்களித்தார்கள். போலீஸ் ஆட்சி வர வேண்டும் என்பதற்காக அல்ல. 'யாருக்கும் கட்டுப்படாமல் காவல் துறை தன்னிச்சையாகச் செயல்படவேண்டும்' என்று முதலமைச்சரே பேசுகிறார். அரசியல் சாசனத்தில் எந்த ஓர் அரசுத் துறைக்கும் இப்படி ஒரு சிறப்பு உரிமை இல்லை. பரமக்குடியில் அன்று நடந்தது என்ன? போலீஸ் டி.ஐ.ஜி-யே பொதுமக்களின் நெஞ்சுக்கு நேராக துப்பாக்கியால் சுட்டிருக்கிறார். அவர் செய்தது, முழுக்க முழுக்க கிரிமினல் குற்றம். எளிய மக்கள் அதுவும் தாழ்த்தப்பட்ட மக்கள் என்றால் போலீஸார் ஏளனமாகத்தான் நடத்துவார்கள். இதில், முதலமைச்சரே போலீஸுக்கு ஊக்கம் கொடுத்துப் பேசினார். இது அவர்களுக்கு மேலும் தைரியத்தைக் கொடுத்துத் தறிகெட்டு நடந்துகொள்ளும் அளவுக்குப் போயிருக்கிறது. பரமக்குடியில் மக்கள் மறியல் செய்தார்கள், ஆர்ப்பாட்டத்தில் ஈடுபட்டார்கள் என்றே வைத்துக்கொள்வோம். அதை போலீஸ் எப்படிக் கையாளவேண்டும் என்ற சட்டரீதியான ஒரு நடைமுறையைக்கூட அன்று பின்பற்றவில்லையே! நீயா... நானா என ரவுடித்தனமாக, நிரபராதிகளான தேவேந்திர குல மக்களை துப்பாக்கியால் சுட்டு ஏழு உயிர்களைப் பறித்திருக்கிறது போலீஸ். சென்னையில் துணை ஆணையராக இருக்கும் செந்தில்வேலனை பரமக்குடிக்கு அனுப்பிவைத்தது யார்? அவரும் டி.ஐ.ஜி.சந்தீப் மிட்டலும் சம்பவத்தன்று சென்னையில் யாரிடம் பேசினார்கள்? குறிப்பிட்ட டி.ஐ.ஜி-க்கும் தி.மு.க-வின் தென் மண்டலப் பொறுப்பாளருக்கும் நெருக்கம் என்று சொல்லப்படுகிறதே? இந்த கேள்விகளுக்கு விடை கிடைக்க வேண்டும். நாங்கள் இதை எளிதாக விட்டுவிட மாட்டோம். ஜெயலலிதாவின் ஒவ்வொரு ஆட்சியிலும் தாழ்த்தப்பட்ட மக்களை அச்சமூட்டி பீதியூட்டுவதையே வழக்கமாக்கிவிட்டார்கள். ஜெயலலிதாவைப் பொறுத்த வரை, தன் தவறுகளுக்காக அவர் வருந்துவதாகவும் இல்லை, திருந்துவதாகவும் தெரியவில்லை. அ.தி.மு.க. அணியில் நாங்கள் சேர்ந்ததன் மூலம் தென் தமிழகத்தில் நல்ல நம்பிக்கை உருவானது. அதை ஒரே நாளில் ஜெயலலிதா நொறுக்கிவிட்டார். இந்த சம்பவத்துக்குப் பிறகும் பாதிக்கப்பட்டவர்களை அ.தி.மு.க. சார்பில் சந்தித்து ஆறுதல் சொல்லக்கூட அவருக்கு மனம் இல்லை. அவர்களின் தலித் விரோதப் போக்கும் மனிதநேயம் இன்மையும்தான் இதில் அப்பட்டமாகத் தெரிகிறது!''

